大澳掃街一日遊

難得放假，就趁住秋風送爽同男朋友入大澳掃下街，拍下拖:D我哋喺東涌搭11號巴士入去，都排咗差不多半個鐘。

一落車就隨住人群去咗食墨魚($18@2粒)同魚旦($14@2粒)先，個魚旦其實同長洲大魚旦冇乜分別，不過咬落真係好爽脆，但我覺得個辣味就唔係好出﹔個墨魚比魚旦更加彈牙，唔怪之得咁多人排隊啦，走個時見到條隊都keep住咁多人㗎!

復興行

評分﹕7/10

地址﹕大澳永安街4號D鋪

第二站我地去到隱姑度食甜茶果($10)，其實我平時都好少食茶果，所以唔知佢算唔算係正宗，不過我食落就覺得個感覺好似花生糯米糍，茶果皮薄煙韌，餡料充足，好似我一樣好少食茶果嘅朋友都可以試吓㗎!

隱姑茶果 

評分﹕6/10

地址﹕大澳永安街11號A

之後去食我最期待已久嘅串燒，未行到餐廳，我就聞到好大陣碳燒味，所以就拉咗男朋友入去食啦，哈哈! 誠意推介嘅係佢嘅碳燒芝士生蠔 ($15)、碳燒芝士扇貝($15)同埋海蝦($38@2隻)。個生蠔同扇貝好juicy，夾埋芝士味道更佳，而我哋見到個餐牌寫住「秘密在蝦腳」就喺好奇心驅使之下叫咗碟海蝦，誓要揭開佢嘅秘密—原來個特別之處就係個蝦腳係可以食嘅，而且咬落仲好香脆，呢個做法真係好特別呀，多數食蝦都只會食蝦肉，可以食埋蝦腳我都好似係第一次。

極上魂燒烤

評分﹕9/10

地址﹕大澳永安街76號地舖

PS: 呢間餐廳只喺星期六、日及公眾假期營業，所以大家如果咁啱嚟到就一定要試吓啦!

周圍行咗一陣，我哋就去排隊食沙翁，喺巴士個陣已經聽到有幾個姨姨喺度討論緊要食幾多個沙翁，見佢咁受歡迎，而且仲係新鮮即炸，就梗係點都要嚟排吓啦!個沙翁約拳頭咁大粒，都只係$13，味道外脆內軟，蛋香十足。

大澳餅店
評分:9/10

地址: 大澳吉慶街66號

食完沙翁，行多幾步就會見到張財記，我哋試咗佢最出名嘅蝦豬餅($25)，其實個感覺好似食手抓餅，但以豬肉碎同生菜做餡料就真係唔係度度都有，啲豬肉碎充滿濃郁蝦醬味，非常開胃可口，而且份量十足，真係好飽肚。老板娘解釋話，因為蝦豬餅個名好似英文Husband，所以佢英文名就係Husband roll。

張財記

評分:8/10

大澳吉慶前街41號地下

Instagram: miki.dreamland

Facebook: miki’s dreamland