2019年5月－中上環新酒吧介紹

呢排見到啲朋友，都會問我有咩地方好介紹去飲嘢食嘢咁樣。啟發咗我不如試吓(試吓咋)，將每個月有機會試過嘅又想推介嘅新地方同大家分享。希望當大家腦閉塞、唔知去邊度飲嘢去邊食嘢嘅時候，幫到大家小小忙啦！

The Sea By The Old Man

恭喜晒呀，好為香港嘅酒吧同業界驕傲呀！點解咁講？因為喺剛剛喺5月9號公布嘅Asia‘s 50 Best Bars，第一位係屬於香港㗎！Yeah! 香港總共有八間酒吧都上咗呢個榜；僅次於星加坡，成為有最多被選為亞洲Best 50 酒吧嘅城市第二位。

咁究竟第一位係邊間香港嘅酒吧？登登登登－The Old Man!！根據公關Em，The Old Man 一向每日開門已經大排長龍，相信呢個Best 50公布咗之後會更加多人嘞！

想去又怕同人迫？唔緊要，我會提議大家去試呢間新開、我將會為大家介紹嘅The Sea By The Old Man。

由被評選為2019亞洲最好嘅酒吧The Old Man 經營，以船倉為室內設計嘅理念，同酒吧名稱The Sea 絕對配合。酒吧絕對唔大，非常cozy。我覺得係幾個好朋友想出嚟傾吓計，又想試多CP值高嘅特別cocktail、又要新地方但唔係好care “to be seen” 嘅推介！

大家可能會問，香港呢個咁寸金尺土嘅地方，點解酒吧會喺大堂中央擺放一張咁大嘅木枱呢？

原來枱底隱藏咗一個雪櫃，令呢張大枱中央嘅特製金屬片枱面keep 住凍，保持飲品嘅溫度。呢個窩心嘅設計，The Old Man都有，亦係酒吧被投選為第一嘅原因之一吧。

鍾意Gin 嘅朋友我會推介呢杯#1，由seaweed gin做base 混合菠蘿味嘅soda，好fresh又唔複雜，絕對可以考慮做全晚第一杯嘅cocktail。($90)

呢杯#9，由山竹釀製而成，味道唔錯㗎。($90)

至於呢杯#6，由青瓜味嘅rum加埋啲sherry acid ，清新之選。($90)

地址：上環普仁街2號地下 (溫馨提示:門口比較隱蔽，大家轉入普仁街之後留意你嘅左手邊係便利店，酒吧站喺便利店嘅正正對面)

The Code

多謝朋友T嘅介紹，位於L. Place 嘅The Code 有180個紅酒label 同埋200幾款gin；紅酒的價錢非常之合理，雖然大多嚟自二三級莊，但係唔知係咪店主自己有挑選過呢，CP值真係非常之高。

Muses ($168): 呢杯以自家釀制嘅桂花gin做base，再混合檸檬汁蜜糖等等，配合埋d桂花smoke一齊上，賣相加打卡已經值回票價啦！

室內設計我自己覺得好啱啲公司用嚟搞Function或者私人party 用。

驚自己唔識揀紅酒？唔驚，佢哋有happy hour ，啲酒唔錯架，價錢又合理。提議未齊人飲個happy hour 先，齊人再叫佢哋幫你揀酒。

老闆講笑話個happy hour menu 會做到我個blog出埋先至加價喎。

老闆嘅私人珍藏gin，啱啱係英國買返嚟，唔知有冇機會試呢？

地址：皇后大道中139號L.Place 17樓

希望大家會鍾意我呢兩個最新嘅推介啦！Happy Monday！星期一做完嘢咁辛苦，會唔會去happy hour 慰勞吓自己呢？

請給我意見丶提點，歡迎:

電郵: jubeychong2004@yahoo.com.hk

iG: Jubey_chong

We Chat: Jubeychong